ABŞ Hərbi Dəniz Qüvvələrinin Hava Döyüşləri Silahlar Mərkəzi (NAWCWD) döyüş təyyarələrinin sürətini və hücum məsafəsini artırmaq potensialına malik yeni bir ramjet mühərrikli raketi uğurla sınaqdan keçirib.

Qaynarinfo xəbər verir ki, bu barədə "Interesting Engineering" məlumat yayıb.

Məlumata görə, sınaq zamanı məsafədən idarə olunan "BQM-34" pilotsuz aviasiya hədəfi vasitəsilə raket buraxılıb. Bu, uzaq mənzilli və yüksək sürətli silahların inkişafında mühüm mərhələ kimi qiymətləndirilir. NAWCWD bildirir ki, raketin pilotsuz platformadan buraxılması, döyüşçülərə hədəfləri daha uzaq məsafədən təhlükəsiz şəkildə vurmaq imkanı verə bilər.

NAWCWD-nin qabaqcıl konsepsiyalar, prototipləşdirmə və eksperimentlər bölməsinin məhsullar üzrə direktoru Ebbi Horninq qeyd edib ki, bu uğurlu inteqrasiya layihənin əsas xüsusiyyətlərini nümayiş etdirir və qabaqcıl enerji qurğusunun yaradılmasına bir addım daha yaxınlaşdırır. Onun sözlərinə görə, bu sayədə döyüş təyyarələri daha uzaq məsafəyə və daha yüksək sürətlə uça biləcək.

"Biz sadəcə köhnə ideyanı yenidən gözdən keçirmirik, onu müasir tələblərə cavab verəcək şəkildə təkmilləşdirir və modernləşdiririk", deyə Horninq vurğulayıb.

Ramjet mühərrik texnologiyası yeni olmasa da, müasir döyüş meydanı üçün uyğunlaşdırılıb. Son sınaqlar raketin konstruksiyasının təkmilləşdirilməsinə yönəlib və bu, gələcək ABŞ Hərbi Dəniz Qüvvələri missiyaları üçün uçuş məsafəsi və dəqiqliyin artırılması məqsədini daşıyır.

Bu texnologiya raket mühərrikinin dizaynını sadələşdirir və maye yanacaqlı mühərriklərdəki mürəkkəbliyi aradan qaldırır. Beləliklə, raketlərin çəkisi əhəmiyyətli dərəcədə azalır və bu da onlara daha çox faydalı yük daşımağa, daha uzun məsafəyə uçmağa və daha yüksək manevr qabiliyyəti nümayiş etdirməyə imkan verir.

Horninq bildirib: "SFIRR - sərfəlilik, etibarlılıq və performans balansını təklif edən, Hərbi Dəniz Qüvvələrinin əməliyyat tələblərinə uyğunlaşdırılmış bir sistemdir"

NAWCWD-nin enerji məsələləri üzrə direktor müavini Efraim Voşbern isə qeyd edib:

"1900-cü illərin əvvəlindən avtomobillərdən istifadə edirik, amma bu, onların təkmilləşdirilməsini dayandırdığımız anlamına gəlmir. 1970-1980-ci illərdə bərk yanacaqlı reaktiv mühərriklərə böyük sərmayə qoyulmuşdu, bu gün isə biz onları müasir dövrün hərəkətverici gücünə çeviririk".

Bəzi hesabatlara görə, ramjet mühərrikləri yalnız hərəkət zamanı itələmə qüvvəsi yarada bilir. Yəni mühərrik yerində dayandıqda itələmə gücü istehsal edə bilmir. Bu səbəbdən, raketin mühərrik işləməyə başlayana qədər kifayət qədər sürət yığması üçün başqa bir enerji qurğusundan istifadə edilməlidir. "Interesting Engineering" qeyd edir ki, aparılmış ilkin sınaqlar göstərib: nəqliyyat vasitəsinin sürəti artdıqca, ramjet mühərrikinin səmərəliliyi də artır, ta ki aerodinamik itkilər üstünlük təşkil edənədək.

Aydın