ABŞ Patent və Marka İdarəsi "Tesla"nın avtonom xidmətinə verdiyi "Robotaxi" adının sektorda geniş şəkildə istifadə olunduğunu əsas gətirərək şirkətin əmtəə nişanı müraciətini rədd edib.

Qaynarinfo xəbər verir ki, "TechCrunch" nəşrinin əldə etdiyi rəsmi sənədlərə əsasən, ABŞ Patent və Marka İdarəsi (USPTO) "Tesla"nın "Robotaxi"nin ticarət markası kimi qeydiyyatdan keçirmə cəhdini qəbul etməyib. Rəsmi açıqlamaya görə, "Robotaxi" ifadəsi ümumi xarakter daşıyır və sektorda bir çox şirkət tərəfindən artıq istifadə olunur.

Bu qərar, "Tesla"nın markalaşma strategiyası baxımından əhəmiyyətli bir maneə hesab olunur. USPTO-nun əsas arqumentlərindən biri, "Robotaxi" sözünün sadəcə izahlı və funksional bir anlayış olmasıdır. Qurum, bu terminlə avtonom idarə olunan ticarət nəqliyyat vasitələrinin uzun müddətdir tanıdıldığını və bu baxımdan konkret bir markanı ifadə edəcək ayırdediciliyə malik olmadığını bildirib.

"Waymo" və "Amazon"un törəmə şirkəti olan "Zoox" kimi rəqib şirkətlərin də bu ifadədən istifadə etməsi, "Tesla"nın bu termini öz adına rəsmiləşdirməsini daha da çətinləşdirir. USPTO-ya görə, bu vəziyyət "Tesla"nın "Robotaxi" üzərində müstəsna hüquq tələb etməsini əsassız edir.

Rədd edilən müraciətə "quru nəqliyyat vasitələri; elektrikli nəqliyyat vasitələri; avtomobillər və onların konstruktiv hissələri" kimi geniş məhsul kateqoriyaları daxildir. Lakin görünür ki, "Tesla" yalnız "Robotaxi" üçün deyil, bu xidmətlə bağlı digər adlarla da oxşar çətinliklərlə üzləşməkdədir.

"TechCrunch"ın məlumatına görə, şirkət "Robobus" kimi alternativ adlar üçün də müraciətlər edib. Lakin bu müraciətlərin nəticələri hələlik qeyri-müəyyən olaraq qalır. Digər tərəfdən, "Tesla"nın avtonom robotaksi xidmətində istifadə ediləcək nəqliyyat vasitəsinə verdiyi "Cybercab" adının da markalaşdırma prosesi problemsiz irəliləmir.

"Tesla" 2024-cü ilin oktyabrında keçirilən və "We, Robot" adlandırılan tədbirdə robotaksi layihəsinin ümumi konturlarını ictimaiyyətlə bölüşüb. Tədbirin mərkəzində sükan və pedal kimi idarəetmə elementləri olmayan, tam avtonom elektrikli nəqliyyat vasitəsi "Cybercab" yer alıb. Bu nəqliyyat vasitəsinin səyahətlər arasında endüktif şarj texnologiyası vasitəsilə enerji yığacağı bildirilib. Sözügedən sistem, naqilsiz enerji ötürülməsi sayəsində avtomobilin fiziki bağlantıya ehtiyac duymadan şarj olunmasına imkan yaradır.

Həmin tədbirdə çoxsərnişin daşınması üçün nəzərdə tutulmuş "Robobus" konsepti də təqdim olunub. Bundan əlavə, "Tesla"nın insana bənzər robot layihəsi olan "Optimus" ilə bağlı yeni görüntülər də paylaşılıb. Bu inkişaflar, "Tesla"nın yalnız avtomobil istehsalı ilə kifayətlənməyib, həmçinin avtonom nəqliyyat sistemləri və robot texnologiyaları sahəsində də geniş vizyon yaratmağa çalışdığını göstərir.

"Tesla"nın "Robotaxi" adını ticarət markası kimi rəsmiləşdirmə cəhdi hələlik uğursuz görünür. USPTO-nun bu qərarı, şirkəti marketinq strategiyalarını və xidmət adlandırmalarını yenidən nəzərdən keçirməyə vadar edə bilər. Bu proses, texnologiya şirkətlərinin ümumi anlayışlarla markalaşmaq istəyində qarşılaşdığı hüquqi məhdudiyyətləri də üzə çıxarır.

Hazırda diqqətlər, "Tesla"nın bu qərara necə reaksiya verəcəyinə və "Cybercab" və ya "Robobus" kimi alternativ adların ticarət markası statusu əldə edib-etməyəcəyinə yönəlib. Aydın olan odur ki, avtonom nəqliyyat texnologiyaları yalnız mühəndislik baxımından deyil, həm də ad hüquqları və marka idarəçiliyi sahəsində ciddi rəqabət meydanı yaradır.

Aydın