Santoriniyə alternativ: Ekspertlər sərfəli istirahət üçün bu yeri təklif edir (FOTO)

Qaynarinfo xəbər verir ki, Altea möhtəşəm mənzərələri, rəngarəng evləri və ümumi mənzərə estetikası ilə tanınır. "Express" nəşrinin yazdığına görə, bu şəhər "İspan Santorini"si adlandırılır, baxmayaraq ki, kifayət qədər məşhur turizm məkanı hesab edilmir.

Blogerlərin fikrincə, bu bölgədə addımbaşı çiçəklərə rast gəlmək olur. Altea həmçinin alış-veriş sevənlər üçün müxtəlif butiklərlə zəngindir. Bundan əlavə, şəhərdə çoxsaylı kafe və restoranlar mövcuddur, istirahət və qəlyanaltı üçün əlverişli şərait təklif olunur. Bu iaşə obyektlərinin yaxınlığında isə günorta saatlarında dincəlmək üçün ideal olan bir çimərlik yerləşir.

Məqalədə qeyd olunur ki, hazırda Altea iqtisadiyyatı əsasən turizmə əsaslanır. Bu sahə 1950-ci illərdən başlayaraq burada mövcud olan gözəl hava, çimərliklər və dar küçələr səbəbilə sürətlə inkişaf edib. Şəhərin ağardılmış fasadlı binaları onun ayırıcı vizual xüsusiyyətlərindəndir. Altea Kosta-Blanka bölgəsindəki digər istiqamətlərlə müqayisədə bir qədər baha məkan kimi tanınsa da, buradakı istirahət nisbətən əlçatan sayılır - xüsusilə əvvəlcədən rezervasiya edildikdə və ya mövsümdənkənar dövrlərdə səfər planlaşdırıldıqda.

Nəşr əlavə edir ki, yaşayış qiymətləri mövsümə görə ciddi şəkildə dəyişir: yanvar ən ucuz, avqust isə ən bahalı ay hesab olunur.

"Əgər Santorini (Yunanıstan) kimi məşhur turizm yerləri ilə müqayisə etsək, bu region daha büdcəyə uyğun sayılır. Çünki Altea Santoriniyə bənzər estetik görünüşü daha aşağı qiymətlərlə təqdim edir. Santorini kimi məşhur məkanlar isə yaşayış, yemək və əyləncə xərclərini əhəmiyyətli dərəcədə artırır. Kiçik bir İspan şəhərini seçərək xeyli qənaət edə bilərsiniz", deyə məqalədə vurğulanır.

 

Digər tərəfdən, Alicante-spain.com saytında turistlər Alteaya dair öz məsləhətlərini bölüşüblər:

"Əgər Altedə qalacaqsınızsa, ətrafdakı kiçik kəndləri də ziyarət etməyə dəyər - xüsusilə şimaldakı La Nusiya kəndi bazar günləri qurulan bazarı ilə məşhurdur və bir günlük səfər üçün ideal seçimdir. Altea boyunca yol boyu mağazalara və avtomobil icarəsi məntəqələrinə rast gələ bilərsiniz. Şəhər ətrafındakı ən cazibədar yerlərdən biri də limandır – burada çoxlu rahat restoranlar və barlar yerləşir".