Rusiya iqtisadiyyatı ağır vəziyyətdədir və neft qiymətlərinin artmasına baxmayaraq hələ də tam bərpa olunmayıb. Üstəlik, rəqəmlərin real vəziyyəti gizlətmək üçün "düzəldildiyi” iddia olunur.

Qaynarinfo xəbər verir ki, bu barədə "Financial Times” nəşrinə İsveçin hərbi kəşfiyyat və təhlükəsizlik xidmətinin rəhbəri Tomas Nilsson bildirib.

Nilssonun sözlərinə görə, Moskva iqtisadi göstəriciləri Qərb auditoriyasını aldatmaq və sanksiyalara baxmayaraq iqtisadiyyatın davamlı olduğu görüntüsünü yaratmaq üçün manipulyasiya edir.

Neftdən asılılıq və büdcə təzyiqi

Onun fikrincə, Rusiyanın əsas ixrac markası olan "Urals” neftinin qiyməti büdcə kəsirini bağlamaq üçün ilboyu 100 dollardan yuxarı qalmalıdır. Daha uzunmüddətli sabitlik üçün isə bundan da yüksək gəlirlər tələb olunur.

Rusiya prezidenti Vladimir Putin də iqtisadiyyatın gözləniləndən zəif işlədiyini etiraf edib. O, neft gəlirlərində müvəqqəti artımın uzunmüddətli həll olmayacağını bildirib.

Hərbi sektor da təzyiq altındadır

Nilsson qeyd edir ki, iqtisadi problemlər artıq müdafiə sektoruna da yayılıb. Müharibə şəraitində iqtisadi artımın əsas hissəsi bu sahədən gəlir, lakin mülki sektor zəifdir.

Onun sözlərinə görə, pilotsuz uçuş aparatları istisna olmaqla, Rusiya hərbi sənaye kompleksi zərər içindədir, korrupsiya və vəsait mənimsənilməsi ilə üzləşib və dövlət banklarının kreditlərinə ciddi şəkildə bağlıdır.

İsveç kəşfiyyatının məlumatlarına əsasən, Rusiya Qərbi çaşdırmaq üçün iqtisadi məlumatları sistemli şəkildə dəyişdirir.

Rəsmi göstəricilər və iddia olunan fərqlər

Rəsmi rəqəmlərə görə, Putin yanvar və fevral aylarında ÜDM-in 1,8% azaldığını bildirib. Xüsusilə sənaye istehsalı və tikinti kimi hərbi baxımdan vacib sahələrdə geriləmə qeydə alınıb.

Nilssonun fikrincə, real vəziyyət daha pisdir. Onun iddiasına görə, Rusiya Mərkəzi Bankı inflyasiyanı aşağı göstərir: rəsmi 5,86% əvəzinə real rəqəm 15%-ə yaxın ola bilər. O, həmçinin Almaniyanın xarici kəşfiyyat xidməti BND ilə razılaşaraq büdcə kəsirinin 30 milyard dollar az göstərildiyini deyir.

"Əgər siz Putinin sistemini qurmusunuzsa, iqtisadiyyatın nə qədər pis olduğunu tam görməyə bilərsiniz. Amma saxta məlumatlarla belə, sonda reallıqdan qaçmaq mümkün deyil”, deyə Nilsson bildirib.

"Rusiya borc hesabına yaşayır”

Nilssonun sözlərinə görə, Rusiya iqtisadiyyatı borc və dövlət maliyyələşməsi hesabına dayanır. O hesab edir ki, iqtisadiyyat ya uzunmüddətli tənəzzül, ya da kəskin böhran ssenarisinə doğru gedir və hər iki halda nəticə maliyyə çöküşü ola bilər.

Siyasi məqsədlər barədə iddialar

Nilsson əlavə edir ki, Moskva ABŞ vasitəçiliyi ilə aparılan sülh danışıqlarını "siyasi tamaşa” kimi qiymətləndirir və əsas məqsədin Putinin ərazi iddialarını gizlətmək olduğunu düşünür.

Onun sözlərinə görə, Rusiya yalnız Donbasla kifayətlənməyə bilər, Ukraynanı Qara dəniz sahillərindən, o cümlədən Odessa şəhərindən məhrum etməyə çalışa bilər. Hətta Kiyevin də gələcək danışıqlarda müzakirə predmeti ola biləcəyi istisna edilmir.

Aydın