Qaynarinfo xəbər verir ki, "Amazon MGM Studios" tərəfindən hazırlanan bu layihə məşhur ikilini ekranda bir daha birlikdə görmək istəyən tamaşaçılar üçün böyük bir hədiyyə olacaq.

İkili ilk dəfə 1994-cü ildə "Sürət” ("Speed”) adlı ikonik aksiyon filmində birgə çalışmış, 12 il sonra isə "Göl evi” ("The Lake House”) adlı fövqəltəbii romantik dramda yenidən bir araya gəlmişdi. "Sürət” filmində Rivz və Bullok, sürəti 80 km/s-dən aşağı düşərsə partlayacaq avtobusda baş verən gərgin hadisələrin içində olmuşdular. Keanu Rivz 1997-ci ildə çəkilən "Sürət 2: Sürətə nəzarət” filminin ssenarisini bəyənmədiyi üçün həmin layihədə iştirakdan imtina etmişdi.

"The Hollywood Reporter”in (THR) məlumatına görə, Rivz və Bullok hazırda adı açıqlanmayan bir romantik triller filmində baş rolları paylaşır. Filmin ssenarisi "Netflix”də yayımlanan "Zero Day” serialının baş ssenaristlərindən biri olan Noa Oppenhaym tərəfindən yazılır. Eyni zamanda, filmdə Robert De Niro da baş rolda çıxış edəcək. Hazırda film haqqında çox az məlumat açıqlansa da, layihənin "təkanverici” və maraqlı olduğu vurğulanır. "Sürət” filminin əvvəlki prodüseri Mark Qordon bu yeni layihədə də prodüser kimi yer alacaq.

Yeni əməkdaşlıq "Sürət 3”ə işarə ola bilərmi?

Filmin mövzusu hələlik gizli saxlanılır, lakin bu birgə iş "Sürət 3”ün mümkünlüyü barədə ümidləri yenidən alovlandırıb. Keanu Rivz "Sürət 2”də ssenarini zəif hesab etdiyi üçün çəkilməkdən imtina etmişdi və nəticədə film həm tənqidi, həm də kommersiya baxımından uğursuz olmuşdu. "Sürət” filminin ssenari müəllifi Qrehem Yost da bu uğursuzluğu əsasən rejissorluq və ssenaridəki çatışmazlıqlarla izah edir. Digər tərəfdən, "20th Century Studios”un rəhbəri Stiv Asbell studiyanın "Sürət” seriyasının davamı üçün hazır olduğunu bildirib.

"Göl evi” filmi tənqidçilər tərəfindən birmənalı qarşılanmasa da, kommersiya baxımından uğur qazanmışdı. 40 milyon dollarlıq büdcəyə malik film bu məbləğin üç qatdan çoxunu qazandırmışdı. Rivz və Bullokun ekran kimyası tamaşaçılar tərəfindən maraqla qarşılanmış və bu yeni filmin də uğur potensialını artırmışdı. Son illərdə Rivz "Con Uik” seriyası ilə, Bullok isə "İtirilmiş şəhər” ("The Lost City”) kimi romantik komediyalarla uğur əldə edib və bu da onların yenidən birləşməsinə olan marağı artırır.

Keanu Rivzin digər planları

Hazırda Keanu Rivz "Con Uik” seriyasının beşinci hissəsi üzərində işləyir. Bu isə onun bu yeni romantik trillerə paralel olaraq digər layihələrdə də iştirak edə biləcəyini göstərir. Tərəfdarları isə Rivz və Bullokun demək olar ki, 20 ildən sonra birgə kamera qarşısına keçərək hansı sinerjini yaradacaqlarını səbirsizliklə gözləyir.

Sandra Bullok romantik komediyalarda özünü çox rahat hiss etdiyi bir dövrdə, Keanu Rivz üçün bu yeni layihə daha fərqli və maraqlı bir seçim ola bilər. Mövzu barədə hələlik qaranlıq məqamlar olsa da, bir məsələ dəqiqdir: bu iki məşhur ulduzun yenidən birləşməsi kinosevərlər arasında böyük həyəcan yaradacaq.

Aydın