Qaynarinfo "The Wall Street Journal”a istinadla yazır ki, vəziyyəti Moskva üçün daha da çətinləşdirən Qərb sanksiyaları 2022-ci ildən sonra infrastrukturun təmiri və qalan obyektlərin servis imkanlarını xeyli məhdudlaşdırıb.

Qeyd olunur ki, Ukrayna pilotsuzlarının dəmir yolları və hava limanlarının işində tez-tez yaratdığı nasazlıqlar daha çox rusiyalını avtomobilə keçməyə məcbur edib. Bu, xüsusilə yay aylarında – məhsul yığım mövsümündə yanacağa olan tələbat kəskin artanda daha da hiss olunur.

Nəticədə bir neçə regionda, o cümlədən Rusiya tərəfindən işğal olunmuş Krımda və Sibirin bəzi hissələrində yanacaqdoldurma məntəqələrində normalaşdırma tətbiq olunub. Benzinin satışda olduğu yerlərdə isə qiymətlər bahalaşıb: bu il Rusiyada 95 markalı benzinin topdansatış qiyməti 45% yüksəlib, halbuki dünya bazarında neftin qiyməti əhəmiyyətli dərəcədə azalıb.

"Bu zərbələr hərbi fəaliyyətə birbaşa təsir etmir, amma Rusiya iqtisadiyyatına zərbə vurur. Rusiya iqtisadiyyatı onsuz da problemlərlə üz-üzədir, belə ki, kiçik bir təkan belə sistem daxilində zəif nöqtələr yarada bilər”, deyə keçmiş xarici işlər naziri Pavlo Klimkin bildirib.

Son bir ayda Rusiyada ondan çox neft emalı zavodu vurulub. Bəziləri sərhəddən yüzlərlə kilometr aralıda yerləşsə də, Ukrayna dronlarının həm say, həm də güc baxımından artması onların əlçatanlığını artırıb.

"Ukrayna artıq uzunmüddətli hücumlar həyata keçirmək iqtidarındadır. Ötən il də buna cəhd vardı, amma döyüş başlıqları yüngül idi və uğur faizi aşağı idi. İndi isə nəticələr aradan qaldırılan kimi yeni zərbə gəlir. Əgər Ukrayna bu təzyiqi davam etdirib zavodlara Rusiyanın bərpa imkanlarından daha tez-tez ziyan vura bilsə, vəziyyət tamamilə dəyişəcək”, deyə "Qazprom neft”in keçmiş strategiya və innovasiya şöbə rəhbəri Sergey Vakulenko qeyd edib.

Bundan əlavə, Ukrayna öz raketlərini də inkişaf etdirir. Bunlardan biri – "Flaminqo” qanadlı raketi – daha böyük döyüş başlığına malik olacaq və müharibədə dönüş nöqtəsinə çevrilə bilər. Oslo Universitetinin raket silahları üzrə eksperti Fabian Qofman hesab edir ki: "Əgər məsafədən zərər verməklə kifayətlənməyib obyektləri tamamilə məhv edə bilən zərbələr həyata keçirilərsə, bu, Rusiya üçün vəziyyəti xeyli çətinləşdirəcək. Rusiya anlamalıdır ki, müharibəni davam etdirdiyi müddətdə Ukrayna ona ciddi zərbə vurmaq gücündə olacaq”.

Analitiklərin fikrincə, yanacaq böhranı təkbaşına Putinin Ukraynadakı strateji hərbi məqsədlərinə və ya daxildəki hakimiyyətinə təsir etməyəcək. Amma bu müharibə şəraitində hər bir pozuntu önəmlidir.

"Bu gün müasir müharibə resurslar uğrunda müharibədir. Ukrayna isə Daviddir – o, nəhəng Qolyafın zəif nöqtələrini axtarır”, deyə keçmiş müdafiə naziri Oleksiy Reznikov vurğulayıb.

Xatıaladaq ki, 21 avqustda Bryansk vilayətindəki "Uneça” neft ötürücü stansiyasında Ukrayna dronlarının hücumundan sonra yanğın baş verib. Bu, bir həftə ərzində ikinci zərbə idi – 13 avqustda da eyni obyekt hədəfə alınmışdı. Həmin hücum Rusiyanın kəmərin işini müvəqqəti dayandırmasına, nəticədə isə Macarıstanın bir neçə gün ərzində neftsiz qalmasına səbəb olmuşdu.

23 avqustda isə Ukrayna Silahlı Qüvvələrinin PUA sistemləri komandanı Robert "Madyar” Brovdi açıqlayıb ki, son bir həftədə Rusiyada dörd neft obyekti vurulub – iki neft emalı zavodu və iki neftötürücü stansiya. Onun sözlərinə görə, Ukrayna Ordusu bununla kifayətlənməyəcək və hücumlar davam edəcək.

Alpər